Maju kawa hkai sha ladat

作者:麻保 来源:德宏团结报 发布时间:2019-01-02 10:28:44

(Shata 12 nhtoi 26 ya na do)

Wara, Maihka Zon Re Kawa Ngau Lo Lang Ai Bo Kawa Yi Gon Lajang Na Ladat

Kawa ngau lo lang ai bo kawa yi nnan gon lajang, nam tsing hkyen seng lajang, nam- hpun dat, ayi pom, kawa pot gumbau htu sho kau re ladat ni go makru lo do sha ai kawa hpan a gon lajang ladat hte ganoi maren sha re, dai re makru madat ton ai lam sha n bung hkat nga ai.

1.Makru madat ton nna  kawa shalo jat la na lam

Wa-hpang gaba chye byin tai wa nna kawa ngau lo lang ai bo kawa hpe go, shaning shagu wa-hpang gade nde maga hta gaba tsom ai makru 5—20 daram madat ton da ra ai, dai hpe kawa ganu byin tai hkra makop ton na. Ndai zon wa-hpang la- ngai mi hta kawa zinghkat 20—60 daram madat ton da ra ai.

Makru hpe atsom makop ton ra ai, masha sa do gajam, dusat ni e sa shang shaza re lam sadi ra ai. Makru do ai shaloi, n byin ai, n chye tu gaba mat sai makru ni hpe sha do la na, gaba tsom ai makru ni hpe go n do, shing n rai loi shau sha do na, kawa lo wa madat ton na matu makru majoi n mai do kau ai.

2.Ramdo htaphtuk ai hku kran sharan kau na lam

Kawa yi hkai shabyin ton ai hpang 3—4 ning daram rai jang go makru grai kru wa lu sai, ndai aten hta makru nau lo jang wa-hpang hte wa-hpang nau chyip hkat mat nna makru nau n kru mat, kawa a gaja shadang n byin mat, kawa bai kran la na matu mung grai n manu mat rai nga ai. Dai majo, kawa yi gaba byin mat ai hpang ramdo htaphtuk ai hku mai kran sharan kau sai, kran sharan ai shaloi, kawa wa-hpang gaji    gaba hte kawa a shadang ko hkan nna ramdo htaphtuk ai hku 3—4 ning daram re kawa ginsa ni hpe mai kran kau sai, grau nna go nau tu shachyat hkat, shing n rai tu masa n byin ai kawa ni hpe lawan wan kran kau ra ai.

Kawa hpe ramdo htaphtuk ai hku kran sharan kau nna     kawa wa-hpang gade nde tu dam jat wa shangun lu yang she, kawa yan hte kawa ndung ran hkat nna makru grau kru jat, kawa grau tu ring tsom ai, kawa ginsa hte kawa hkinlung a shadang hpe nong e htaphtuk ai hku atsom sharam ton nna, wa-hpang a asak sharen ya rai nhtom, kawa wa-hpang galoi mung tu ring tsom nga na hku galo ya ra ai.

Kawa kran sharan yang, “Myu 4 hpe madat myu 4 hpe kran kau” ngu ai tara maka hta hkan ra ai, “Myu 4 hpe madat myu 4 hpe kran kau” ngu ai go, gaji ai kran kau gaba ai hpe madat, ginsa ai kran kau hkinlung ai hpe madat, n byin ai kran kau tu tsom ai hpe madat, nau chyip ai ko na kran kau ran ai hkan na madat ton re galo ladat hpe tsun ai re.

3.Kawa ngau kran na lam

Kawa ngau kran na rai yang, kawa a asak, greng ja  shadang, aten lado re ndai lamyi laman 3 hpe atsom chye ton ra ai.

Kawa ngau shatai na rai jang, 3—5 ning daram re go grai hkrak sai, ndai aten hta lu kran la kau yang, kawa grau bai tu jat wa na matu akyu rong nga ai.

Kawa ngau kran yang, 1—2 ning sha re kawa hkinlung ni hpe go ma-hkra madat ton da ra ai, 3 ning re kawa nkau hpe mung no madat ton da ra ai, 4 ning a lahta de na kawa ginsa ni hpe go ma-hkra kran kau ra sai. Wa-hpang galoi mung amasa rai tu ring tsom nga na matu, kawa tu jat shadang ko lai jan mat hkra n mai kran kau ai.

Kawa ngau hpe go nshung lado hte hting-ra lado hta kran la yang grau hkrak ai, ndai aten hta makru n kru nna kawa a tu hkrung shamu shamot lam nau n byin ai, ndai aten hta kawa ngau kran la yang wa-hpang hpe nau n wa-hkye hkra ai hta n-ga, kawa hpun na ahka, ahtang hte gaga chye tun ai dat namshum a rong shadang ni mung grai nyem nga ai, dai majo, ndai aten hta kran la ai kawa go shingtai n sha, n chye hten, n chye kyip mat ai, ndai zon re kawa ngau hpe go galo sama lang yang grai gaja nga ai.

Kawa ngau kran yang, kawa pot hte aga man gahtep hkat ai yang na ara sha di kran ra ai.(Bai matut  hti ga)

  (Gale ai Zinghtung Ma Sam)


编辑:岳元胜